ქ.ბათუმში მე-14 საერთაშორისო კონფერენცია - „საქართველოს ევროპული გზა“ გაიხსნა

13 ივლისს, ქ. ბათუმში, რიგით მე-14 საერთაშორისო კონფერენცია "საქართველოს ევროპული გზა - რეგიონული სტაბილურობის უზრუნველყოფა" გაიხსნა. კონფერენცია ევროპულ და ევროატლანტიკურ სტრუქტურებში ინტეგრაციის საკითხებში საქართველოს სახელმწიფო მინისტრმა ვიქტორ დოლიძემ გახსნა.

"თამამად შეიძლება ითქვას, რომ ბათუმის ტრადიციული კონფერენცია, რომელიც ჩვენს „ზაფხულის დედაქალაქში" წელს უკვე მე-14-ედ ტარდება, საერთაშორისო ბრენდად იქცა. წლიდან წლამდე, კონფერენცია სულ უფრო მეტი მონაწილის ინტერესს იწვევს, რაც მის მზარდ მნიშვნელობაზე მიანიშნებს. მონაწილეთა რაოდენობის მხრივ, კონფერენციისთვის ეს რეკორდული მაჩვენებელია.
ძალიან სასიხარულო და ამავდროულად სიმბოლურია, რომ დღეს ამ დარბაზში ერთან სხედან ხელისუფლების სხვადასხვა შტოს წარმომადგენლები - საქართველოს პრეზიდენტი, პრემიერ-მინისტრი და პარლამენტის თავმჯდომარე. ეს, კიდევ ერთხელ უსვამს ხაზს ჩვენი ქვეყნის პოლიტიკური ელიტის კონსენსუსს ჩვენი საერთო - ევროპული გზის თაობაზე.

აქვე, ნება მომეცით, სტუმრებს შორის განსაკუთრებით გამოვყო ევროკომისიის ენერგეტიკული კავშირის ვიცე-პრეზიდენტი, ბ-ნი მაროშ შეფჩოვიჩი, რომლის კონფერენციაში მონაწილეობაც ენერგეტიკის სფეროში საქართველო-ევროკავშირის თანამშრომლობის მნიშვნელობას კიდევ ერთხელ უსვამს ხაზს. მინდა, ასევე პერსონალურად მივესალმო ბ-ნი ვაზილ ჰუდაკს, ევროპის საინვესტიციო ბანკის ვიცე-პრეზიდენტს და დიდი მადლობა გადავუხადო ჩვენი ქვეყნის მხარდაჭერისა და დახმარებისთვის.

თავისი უახლოესი ისტორიის მანძილზე საქართველო არასოდეს ყოფილა ევროკავშირთან და დემოკრატიული ევროპული ქვეყნების ოჯახთან ისე ახლოს, როგორც დღეს!

წლევანდელ კონფერენციასთან დაკავშირებით, მსურს რამდენიმე მნიშვნელოვანი მოვლენა გამოვყო: საქართველოს მოქალაქეებისთვის ევროკავშირთან უვიზო მიმოსვლის ამოქმედება, საქართველოს ენერგოგაერთიანებაში გაწევრიანება, რომის ხელშეკრულებების მე-60 წლისთავი; აღმოსავლეთ პარტნიორობის მოახლოებული სამიტი.

ასოცირების შესახებ შეთანხმებისა და მისი ღრმა და ყოვლისმომცველი ვაჭრობის სივრცის კომპონენტის (DCFTA) შესაბამისად, ევროპულ სტანდარტებთან დაახლოების მიზნით, წარმატებით მიმდინარეობს ჩვენი ქვეყნის ინსტიტუტებისა და კანონმდებლობის ყოვლისმომცველი რეფორმირების პროცესი.

ჩვენთვის, ძალიან ღირებული თვითონ ევროინტეგრაციის პროცესი და თანმხლები რეფორმები, რაც უპირველეს ყოვლისა, ჩვენი მოსახლეობის კეთილდღეობასა და ნათელ/უკეთეს მომავალს ემსახურება.
ძირეული რეფორმების განხორციელების კომპლექსურ, გამოწვევებით დატვირთულ პროცესში, ჩვენი ქვეყანა მნიშვნელოვან ფინანსურ დახმარებას იღებს ევროკავშირისგან. მინდა კიდევ ერთხელ ვისარგებლო შემთხვევით და დიდი მადლობა გადავუხადო ევროკავშირს ამ დახმარებისთვის.

ნება მომეცით, ზედმეტი თავმდაბლობის გარეშე განვაცხადო, რომ ევროპული სული დღეს საქართველოშიც ცოცხალია. სწორედ ის სული, რომელიც დღეს ასე ჭირდება ევროპას.

საქართველოს მოსახლეობის უდიდესი ნაწილი მხარს უჭერს ჩვენი ქვეყნის ევროკავშირში გაწევრიანებას. მეტიც, ევროპული ტიპის სახელმწიფოს მშენებლობა არის ჩვენი - მთავრობის ვალდებულება, რომელიც საკუთარმა მოსახლეობამ დაგვაკისრა და რომელსაც აუცილებლად ღირსეულად შევასრულებთ."-განაცხადა სახელმწიფო მინისტრმა.

კონფერენციის მონაწილეეებს სიტყვით მიმართეს საქართველოს პრეზიდენტმა გიორგი მარგველაშვილმა, საქართველოს პრემიერ-მინისტრმა გიორგი კვირიკაშვილმა, საქართველოს პარლამენტის თავმჯდომარემ ირაკლი კობახიძემ, ევროკომისიის ვიცე-პრეზიდენტმა, ენერგოკავშირის საკითხებზე პასუხისმგებელმა მაროშ შევჩოვიჩმა და ევროპის საინვესტიციო ბანკის ვიცე-პრეზიდენტმა ვაზილ ჰუდაკმა.

კონფერენციაში მონაწილეობენ საქართველოს, ევროკავშირის და „აღმოსავლეთ პარტნიორობის" წევრი ქვეყნების აღმასრულებელი ხელისუფლების წარმომადგენლები, პარლამენტარები, ასევე, სამოქალაქო საზოგადოების, აკადემიური წრეების, მედიისა და ბიზნეს სექტორის წარმომადგენლები.

საერთაშორისო კონფერენცია - „საქართველოს ევროპულ გზა - რეგიონული სტაბილურობის უზრუნველყოფა", 2007 წლიდან, ტრადიციულად, ევროპულ და ევროატლანტიკურ სტრუქტურებში ინტეგრაციის საკითხებში საქართველოს სახელმწიფო მინისტრის აპარატის ორგანიზებით ტარდება.

სხვა ამბები

  • ვიქტორ დოლიძის ვიზიტი დანიის სამეფოში „ახლოვდება აღმოსავლეთ პარტნიორობის სამიტი, ასევე, მომავალ წელს გაიმართება ნატოს სამიტი და ჩვენ უნდა ვიყოთ მზად იმისათვის, რომ კიდევ უფრო დიდი და მნიშვნელოვანი ნაბიჯები გადავდგათ როგორც ინტეგრაციული თვალსაზრისით, ისე ქვეყნის შიგნით მიმდინარე რეფორმების თვალსაზრისით"-განაცხადა ვიტორ დოლიძემ დანიის სამეფოში სამუშაო ვიზიტის დასრულების შემდეგ.
  • კონფლიქტის მოგვარების საკითხზე ნატო-საქართველოს კომისიის სხდომა გაიმართა 2017 წლის 20 სექტემბერს ბრიუსელში, ნატო-ს შტაბ-ბინაში გაიმართა ნატო-საქართველოს კომისიის სხდომა მუდმივი წარმომადგენლების დონეზე, სადაც განხილეს კონფლიქტის მოწესრიგებისა და შერიგების საკითხი. სხდომას ნატო-ს გენერალური მდივნის მოადგილე როუზ გოტმიოლერი თავმჯდომარეობდა.
  • ვიქტორ დოლიძის ვიზიტი ისლანდიის რესპუბლიკაში „ისლანდიამ საქართველო უკვე შეიყვანა უსაფრთხო ქვეყნების სიაში, ისლანდია აღიარებს საქართველოს, როგორც ერთ-ერთ რეფორმატორ, მნიშვნელოვან ქვეყანად და პარტნიორად, ეს არის ძალიან მნიშვნელოვანი ჩვენთვის."-განაცხადა ვიქტორ დოლიძემ ისლანდიის რესპუბლიკაში სამუშაო ვიზიტის ფარგლებში გამართული შეხვედრების კომენტირებისას.