დავით ბაქრაძის შეხვედრები და "საქართველოს ევროპული გზების" პრეზენტაცია შვედეთში

27-28 აპრილს, შვედეთის სამეფოში, ქ.სტოკჰოლმში სამუშაო ვიზიტის ფარგლებში ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრმა დავით ბაქრაძემ ორმხრივი შეხვედრები გამართა იუსტიციის სამინისტროს იუსტიციის და მიგრაციის მინისტრთა ნმორგან იოჰანსონთან, საგარეო საქმეთა სამინისტროს სახელმწიფო მდივანთან ანიკა სოდერთან დაშვედეთის სამეფოს იუსტიციის სამინისტროს შინაგან საქმეთა მინისტრის სახელმწიფო მდივანთან ანნ ლინდესთან.
სამუშაო ვიზიტის ფარგლებში სახელმწიფო მინისტრმა, ასევე, ორმხრივი შეხვედრა გამართა შვედეთის პარლამენტის სპიკერთან ურბან ალინთან და მრგვალი მაგიდის ფორმატში საგარეო ურთიერთობებისა და თავდაცვის კომიტეტების წევრებსაც ესაუბრა.
შვედეთის აღმასრულებელი და საკანონმდებლო ხელისუფლების წარმომადგენლებმა დაადასტურეს როგორც საქართველოს სუვერენიტეტისა და ტერიტორიული მთლიანობისადმი, ისე ევროპული მისწრაფებებისადმი მტკიცე მხარდაჭერა და გამოხატეს მზაობა საქართველოში დემოკრატიული ინსტიტუტების კიდევ უფრო განმტკიცებისა და ევროინტეგრაციის პროცესში ხელშეწყობის თაობაზე.
28 აპრილს შვედეთის საერთაშორისო ურთიერთობების ინსტიტუტში ინგლისურენოვანი კრებულის „საქართველოს ევროპული გზები" პრეზენტაცია გაიმართა. კრებულის პრეზენტაცია შვედეთის საერთაშორისო ურთიერთობების ინსტიტუტში გამართული დისკუსიის „საქართველოს ევროპული ამბიციები და გამოწვევები" ფარგლებში ჩატარდა.
ევროკავშირსა და ნატოში ინტეგრაციის აქტუალურ საკითხებზე, რეგიონში არსებულ გამოწვევებზე, საქართველოს წარმატებული მაგალითის მნიშვნელობაზე ღონისძიების მონაწილეების წინაშე სახელმწიფო მინისტრმა დავით ბაქრაძემ ისაუბრა. მოწვეულ სტუმრებს კრებული „საქართველოს ევროპული გზები" მწერალმა და წიგნის რედაქტორმა ზურაბ ქარუმიძემ წარუდგინა, რომელმაც დეტალურად ისაუბრა ევროპული და ქართული კულტურის ისტორიულ პარალელებზე, ასევე, პოლიტიკურ-კულტურულ პერსპექტივებზე გაამახვილა ყურადღება.

სხვა ვიდეოები